Osterferien

Miner Osterferie hani genau mit boarde agfange. Vom Samstig bis am Zistig simer jeda Tag ga boarde. Leider hani du nai mis Board ommi muesse zrug gae will si das ommi brucht hi. Auso bueni am Mittwuche (bi schoenstem Waetter) dehim bluebe und ha mis Zuemmer we ufgruumt und putzt will am Donnstig d Allison het soelle zu mier cho.
Allison u i d Schneemobil-Fahrer
Am Donnstig isch zerst wunderschoes Waetter gsi, aber nai so am Mittag hets gwaechslet und wier hi Schnee und Wind ghaebe. Auso hi kiner Flugzueg choene cho was hisst das d Allison erst am Fritig het choene fluege. U da si unbedingt het woelle cho isch si scho mitem erste Flugzueg cho was hisst: nit usschlafe... u das ide Ferie.... haiaiai
Ja di naechste paar Tage isch nai vous Programm gsi:
Fritig simer zerst iz Schwuemmbad, Rutschbahn und Hot Pot usprobiert. Nai diraekt uf Ísafjörður zum Skigebiet. Disi Wucha isch oh Skiwucha gsi in Ísa und daerum hets det as Konzaert gae, as Renne fuer Chin, Snowboard Jump Contest und de Hoehepunkt: as isch as chlises Flugzueg cho und het Nammi (suessigkiite und Schueggeleni) ai gschmitzt und alli Chin hi choene ga isammle!

Dr. Spock und der Maennerchor (www.youtube.com -> dr. spock hvar ert þú )
Am Abe simer nai az *Aldrei fór ég suður* (genau uebersetzt: no nie bueni i Suede. was meh mit no nie bueni nach Reykjavík) was so as chlises Open Air Konzert in Ísafjörður isch. Das gits iz siit 5 Jahr u wuerd ging bekannter u groesser. Dieses Jahr hi sich 150 Bands gemaeudet und as chi numme so 35 ga. Und ja as isch hoelle lustig gsi.
Nai am Samstig simer spat uf und nai diraekt uf z Schneemobil mitem Pabbi und mim Onku. Wier si im ganze 3 Stune gsi und hi oh saeuber toeffe fahre. Nai ommi uf Ísa az Aldrei und a daem Abe isches no lustiger gsi. Wier hi 3 anderi Ustuschschueler troffe und oh we mit as paar Luet gredt vo im Herbst hie ide Schuel si gsi und iz fuer d Osterferie ommi si cho d Luet bsueche. U am Samstig abe hets no as wunderschoes Polarliecht ghaebe dusse!!! wuerklich so as grosses hani no nie gseh... leider hani d Kamera nit debi ghaebe...
I u Mugison a bekannta islaendischa Saenger
u am Sunntig himers nai we gmuetlich gno: wier si a Strand ga spatziere und hi we DVD gugget und am Abe simer az Theater (Rocky Horror).
Am Mentig morge isch d Allison nai ommi him und i ha agfange Huusufgabe mache da hie d Osterferie numme bis huet, Zistig de 25. gaenge. Was hisst wier hi mor ommi Schuel... SCHADE!!! Aber nai himer no 4 Wuche und 2 haubi Wuche Schuel u nai feh schommi d Summerferie an.
Oh je da chunnt mer nai grad ommi i Sinn dassi iz numeno weniger aus 3 Monat hie bue.... iz grad bueni we gstresst u wott no nit him. I hamer hie iz as Laebe ufbuut und oh wenes mengisch we aschisst, as isch ueberwiegend schoen u lustig. U iz woni d Sprach fasch perfekt *huestel* chan u wuerklich mit de Luet cha rede u so gfauts mer nomau ging wie meh... u wases natuerlich no schwerer macht isch ifach dasmu wiss das so as Utschuschjahr einmalig isch... klar chamu evtl. nomau hie haere cho... aber denn ischmu schomi a Tourist und nuemme a fasch-Iwohner....
Aber i gniesse iz emu mini Zit hie no, vorallem de Winter vo nie wott ende... glube i waerde no im Maie Schnee ha! (u nai im Schwiizer Summer staerbe vor Hitz....) u oh wenni no nit him wott freueni mier uf dehim und alli ommi z gseh und ommi i mim grosse Bett z schlafe und und und. Aber i waerde Island sicher vermisse!